05. mars 2016 til 03. apríl 2016

Afmælissýning í tilefni af 100 ára afmæli ASÍ

ATH. Opnunartími um páska: Listasafn ASÍ er lokað föstudaginn langa, 25. mars, páskadag 27. mars og mánudaginn 28. mars (annan í páskum). Listasafn ASÍ 5. mars – 3. apríl 2016 Í stórfenglegri listaverkagjöf Ragnars Jónssonar í Smára til Alþýðusambands Íslands, sem varð kveikjan að stofnun Listasafn ASÍ 1961, eru mörg af þekktustu myndverkum tuttugustu aldar eftir nokkra fremstu listamenn þjóðarinnar: Ásgrím Jónsson, Jón Stefánsson, Jóhannes Sveinsson Kjarval og Svavar Guðnason. Á þeim áratugum sem liðnir eru frá stofnun safnsins hefur það vaxið og dafnað og safneignin aukist verulega. Á sýningunni: Perlur úr safneign Listasafns ASÍ verða verk eftir ofangreinda listamenn sýnd í bland við aðrar og minna þekktar perlur úr safneigninni sem kallast á við verk gömlu meistaranna á margbreytilegan hátt. Sýningarstjóri er Kristín G. Guðnadóttir.

Á fyrri hluta síðustu aldar varð vinnan og hinn vinnandi maður mikilvægt myndefni í íslenskri myndlist. Má þar nefna listamenn á borð við Gunnlaug Scheving og Ásmund Sveinsson sem máluðu eða mótuðu hinn vinnandi mann þegar vinna var líkamlegt erfiði og stór hluti vinnandi manna voru sjómenn, bændur eða verkamenn. Í verkum Jóns Engilberts er stéttabaráttan einnig til umfjöllunar og kreppa fjórða áratugarins verður nánast áþreifanleg í verkum Snorra Arinbjarnar og Þorvaldar Skúlasonar. En hver er afstaða myndlistarmanna dagsins í dag til vinnunnar í hátækniumhverfi samtímans? Er vinnan ennþá umfjöllunarefni í samtímamyndlist og á hvaða hátt er þetta viðfangsefni túlkað ? Þessum spurningum verður leitast við að svara með sýningu sem ber vinnuheitið: Vinnan í sögu og samtíma í íslenskri myndlist. Þar verður stillt saman verkum frá síðustu öld og verkum úr samtímanum sem takast á við þetta viðfangsefni á ólíkan hátt. 

Til baka