21. maí 2016 til 26. júní 2016

John Zurier og Hreinn Friðfinnsson - Við vorum einu sinni nágrannar

21. maí til 26. júní 2016. Sýning á innsetningum Hreins Friðfinnssonar og málverkum John Zurier.

Ljóðræna skynjunar, staðar, tíma og endurminninga skapa sameiginlegan, tilfinningalegan þráð milli umbreyttra fundinna hluta og innsetninga Hreins Friðfinnssonar og abstrakt málverka John Zurier.

John Zurier

John Zurier fæddist 1956 í Kaliforníu þar sem hann býr og starfar. Hann hefur sýnt verk sín víða um heim, m.a. í UC Berkeley listasafninu í Kaliforníu, á Sao Paulo tvíærngnum og á Whitney tvíæringnum. Verk eftir hann eru í eigu Moderna Museet í Stokkhólmi, Berkeley Art Museum, Museum of Modern Art o. fl.

Zurier málar andrúmsloft  inn í  óhlutbundin verk  sín.  Titlarnir gefa engar skýringar þó tæpt sé á túlkunarmöguleikum,  inntak málverkanna verður til í efninu sem geymir minningar um  liti og birtu frá einstökum stöðum og tíma.

Undanfarin ár hefur John Zurier oft dvalið á Íslandi og íslensk náttúra og birta er iðulega nærverandi í verkum hans.

 

Hreinn Friðfinnsson

Hreinn fæddist árið 1943 og útskrifaðist frá Handíða- og myndlistaskóla Íslands 1960.  Hann er einn af frumkvöðlum nýlistar og hugmyndalistar hér á landi og var m.a. var einn af stofnendum SÚM.

Verk Hreins eru í senn ljóðræn og heimspekileg  og snúast iðulega um eitthvað sem ekki er eða eitthvað loftkennt og ósnertanlegt eins og ljósið eða vindinn. Hreinn hefur sýnt verk sín víða um heim, meðal annars  var hann með stóra sýningu í Serpentine Galleríinu  í London árið 2007 sem sló aðsóknarmet safnsins og árið 2014 var frumsýnd í Nýlistasafninu  kvikmynd um ævi og störf Hreins eftir Ragnheiði Gestsdóttur og Markús Þór Andrésson.

Til baka