Hlynur Hallsson og Jóna Hlíf Halldórsdóttir – ÁFRAM MEÐ SMJÖRLÍKIÐ!
12. júní – 4. júlí 2010
Hlynur Hallsson og Jóna Hlíf Halldórsdóttir
Hlynur Hallsson og Jóna Hlíf Halldórsdóttir vinna saman að **þríleiknum Áfram með smjörlíkið! ** sem fer fram í Reykjavík, Djúpavík og Berlín sumarið og haustið 2010. Þetta er í fyrsta sinn sem þau vinna saman að sýningaröð, en bæði eiga þau að baki víðtæka reynslu af sýningarhaldi, hvort sem er í samstarfi við aðra eða í eigin verkum.
Yfirskriftin Áfram með smjörlíkið! slær taktinn og gefur fyrirheit um viðfangsefni listamannanna. Fyrsta sýningin í röðinni opnar í Listasafni ASÍ 12. júní 2010 og ber undirtitilinn Innantóm slagorð. Þar er unnið með margvíslegan efnivið, þar á meðal söguna og smjörlíki, og liggur til grundvallar athugun á listinni og tengslum hennar við hagkerfið.
Sýningunni, sem stendur til 4. júlí 2010, fylgir bókverk sem Hlynur og Jóna skapa í sameiningu.
Sýningaröðin
Önnur sýningin er haldin í Verksmiðjunni á Djúpavík. Undirtitill hennar er
„… og tilbiður guð sinn sem deyr“ og samanstendur hún af rýmisbundnum innsetningum í fyrirrúmi.
Sýningin opnar 17. júlí 2010 og stendur til 28. ágúst 2010.Þriðja sýningin opnar 3. september 2010 í 111 – a space for contemporary art í Berlín og ber undirtitilinn
Byltingin er rétt að byrja. Þar lýkur sýningaröðinni.
Verk Hlyns og Jónu eru einföld, fjölbreytt og hugmyndarík. Þau vinna bæði með marga ólíka miðla, þar á meðal ljósmyndir, myndband, texta, gjörninga og innsetningar. Val miðils ræðst af hverju verki fyrir sig og þátttaka áhorfandans er oft mikilvægur hluti upplifunarinnar.
Í verkum beggja er að finna margbrotna en um leið einfalda tjáningu. Verkin virðast á einhvern hátt hrein og bein og eiga greiða leið inn að hjarta- og heilarótum. Sum þeirra eru læðvís, önnur kröftug, og mörg bera slagorðalegan blæ. Einfaldleikinn talar beint til manns og virðist fela í sér ákveðna nánd – kannski falska (hver veit?).
Listamennirnir
Hlynur Hallsson (f. 1968) er menntaður við Myndlista- og handíðaskóla Íslands og við listaháskóla í Hannover, Hamborg og Düsseldorf í Þýskalandi. Hann hefur verið gestakennari við Myndlistarskóla Akureyrar og hlotið ýmsa styrki og viðurkenningar fyrir verk sín.
Jóna Hlíf Halldórsdóttir (f. 1978) er menntuð við Listaháskóla Íslands, var í námi í Finnlandi og lauk MFA-gráðu frá Glasgow School of Art í Skotlandi. Hún er safnstjóri hjá VeggVerk og Gallerí Ráðhús og hefur, líkt og Hlynur, hlotið ýmsar viðurkenningar og styrki fyrir verk sín.
