Halldór Ásgeirsson og Paul-Armand Gette
16. maí 2008 – 15. júní 2008
Halldór Ásgeirsson og Paul-Armand Gette sýna verk sem eru innblásin af hinum fjölmörgu eldfjöllum Íslands. Í verkum sínum notar Halldór logsuðutæki til að umbreyta grófgerðu hrauni í undursamlega fíngerða glerfugla, en Gette beitir mun vísindalegri nálgun og tækni.
Paul-Armand Gette fæddist í Lyon í Frakklandi 13. maí 1927. Árið 1935 gekk hann í fyrsta sinn upp eldfjallið Vesúvíus, sem kveikti löngun hans til að fara yfir mörk hins þekkta. Árið 1956 skapaði hann myndverkið Kalkbrennsla, prentverk og skúlptúra unnin meðal annars úr svörtu efni, hrauni og tabula rasa.
Halldór Ásgeirsson fæddist í Reykjavík 13. október sama ár. Árið 1971 tók Paul-Armand Gette upp kvikmyndina Crystalmeð röddum William S. Burroughs og Brion Gysin, á sama tíma og Halldór var ráðinn messagutti á m/s Jökulfelli sem sigldi til New Bedford í Bandaríkjunum — þar sem sagan um Moby Dick eftir Herman Melville hefst.
Árið 1977 tók Gette þátt í Documenta 6 í Kassel, en Halldór hóf um haustið myndlistarnám við Háskóla Parísar VIII (Vincennes). Árið 1978 var Gette fulltrúi Frakklands á Feneyjatvíæringnum, á meðan Halldór stundaði veggmyndagerð í París og gerði kvikmyndina Svört gríma í París og Reykjavík.
Árið 1986 sýndi Gette verk sín á salernum þriðju hæðar MNAM í Pompidou-safninu í París, en Halldór hannaði forsíðu og birti teikningar í fyrsta tölublaði norræna myndlistartímaritsins SIKSI. Árið 1991 sýndi Gette L’amour de l’art á Lyontvíæringnum og tók þátt í 21. São Paulo-bíennalnum. Um svipað leyti fór eldurinn að sækja æ meir á Halldór, sem varð til þess að hann hóf tilraunir með hraunbræðslu.
Árið 1996 setti Gette upp sýninguna In Natura rerum í Fagurlistasafninu í Nantes, en Halldór sýndi í febrúar ljósaverkið Postularnir tólf í aflagðri kapellu í Clermont-Ferrand. Árið 1999 sýndu þeir saman í Buchsenhausen Ausstellungsraum í Innsbruck í Austurríki.
Sumarið 2001 var Gette boðið að sýna í Ljósaklifinu í Hafnarfirði. Þar vann hann annars vegar með hafið, þang og skeljar og hins vegar jörðina, eldfjöllin og hraunið, og bætti síðar við blómum þar sem þau eru kynfæri plantna. Sama ár bræddi Halldór saman hraunsteina úr eldfjöllunum Vesúvíusi og Heklu, sem leiddi til getnaðar þeirra á Mílanótríennalnum. Um haustið beitti hann sömu aðferðum á Heklu og Fuji í Klakhárhofinu í Japan.
