Unnar Örn J. Auðarson – BROTABROT ÚR AFREKASÖGU ÓEIRÐAR: II. HLUTI

15. mars 2014 – 6. apríl 2014
Unnar Örn J. Auðarson – Brotabrot úr afrekasögu óeirðar: II. hluti

Á sýningu sinni Brotabrot úr afrekasögu óeirðar: II. hluti gerir Unnar Örn Listasafn ASÍ að vettvangi óeirðar. Vegsumerki um óhlýðni frá ólíkum tímabilum eru dregin fram og skoðuð í sjónrænu samhengi.

Verkin á sýningunni eru unnin upp úr heimildum sem hafa þjónað ólíkum stofnunum. Ljósmyndir frá Tæknideild Rannsóknarlögreglunnar, myndskeið úr heimildasafni Ríkisútvarpið og skjöl frá Þjóðskjalasafn Íslands mynda sögusvið sýningarinnar.

Hugmyndafræði og samhengi

Viðfangsefni sýningarinnar er geymd opinberra upplýsinga sem tengjast viðspyrnu almennings gegn ríkjandi valdhöfum. Frásögn óeirðar almennings er stöðugt afmáð úr sameiginlegu minni þegnanna – skipt er um rúður, veggir málaðir og varnargirðingar fjarlægðar.

Á sama tíma safnar valdstjórnin stöðugt sönnunargögnum og þær heimildir mynda samfellda frásögn sem varðveitt er í opinberum skjölum. Sviðssetning þjóðarvitundar myndar í sýningunni endurtekið stef þar sem brot úr nýliðnum tíma eru undirtónninn.

Á árinu 2014 kemur út bók þar sem viðfangsefni sýningarinnar eru tekin fyrir og verður hún lokahnykkurinn í vettvangsrannsókn Unnars Arnar á afrekasögu óeirðar hér á landi.

Heimildamynd

Ein ljósmynd sýningarinnar er sönnunargagn safnað af Tæknideild Rannsóknarlögreglunnar og sýnir afleiðingar óeirðar almennra borgara í tengslum við inngöngu Íslands í Atlantshafsbandalagið 30. mars 1949.
Krossarnir merkja rúðurnar sem brotnar voru.
Ljósmyndin er varðveitt í Þjóðskjalasafni Íslands.

Um listamanninn

Unnar Örn J. Auðarson nam við Myndlista- og handíðaskóla Íslands og lauk framhaldsnámi við Listaakademíuna í Malmö. Á undanförnum árum hefur hann unnið með fundið efni – ljósmyndir, kvikmyndir og texta – sem ramma inn þá frásögn sem hann vinnur með hverju sinni.

Verk Unnars eru unnin í ólíkum miðlum og eru oftar en ekki hlutar úr stærri seríum þar sem hann vinnur gagnrýnið með umhverfi sitt og hlutverk listamannsins innan þess. Hann hélt sína fyrstu einkasýningu í Gallerí Gúlp í Kringlunni árið 1996 og hefur síðan tekið þátt í yfir sextíu sýningum hérlendis og erlendis.